هي : شفت فيديو الطيبي تبع "انا عربي يا جحش.. يا جحشش… جحششش… جحششش"...
هو: اه الفيديو الذي تشيير ملون مرة على الفيس بوك، بعرفو. شو زكرك فيه؟

هي: بعرفش.. بس دخلك شو عملوا النواب العرب بالكنيست بموضوع قانون تغذية الاسرى؟!.

هو: اظن طلّعوا بيان، وصوتوا ضد

هي: هالمرة خليني اخد الموضوع بحسن نية… فرجيني..الكونيكشن شوي بطئ.. شوف هالبيان شديد اللهجة!!

هو: شو بدك يعملو يعني؟ حبيبتي هدول بعملو الي بقدرو عليه

هي: بقدروا عليه؟! يحطّو مكياج لاسرائيل البشعة؟! الديمقراطية الوحيدة بالشرق لي فيها اقلية عربية ممثلة بالسلطة التشريعية

هو: شو بتتفلسفي. لولا هدول ما كان حدا سمع صوت فلسطينية 48

هي: مش فلسفة، بس مش منطق تعطي الاحتلال شرعية وتعتبر انو انت مشكلتك مع الاسرائيلي هي موضوع المساواة، كيف بتقبل تتساوى مع المجرم

هو: شو بتحبي الشعارات!!

هي: مش شعارات، "صرماية ابو عمار اشرف منك" هي الشعارات الخشبية.. وبتعرف اسوأ من استعراضات معتز بباب الحارة

هو: شو مشكلتك مع الطيبي؟

هي: مشكلتي مع كل الي بشاركوا انتخاباً وترشحاً، مش فلسفة بالفصحى بس ما زبطت الا هيك. بس انو دخلك مين بتشوف عالفيس بوك غير الطيبي، ومرات حنين الزعبي. الباقيين فاشلين بالدعاية بعد ما فهموا اهمية اليوتيوب والفيس بوك وهالحركات

هو: شو بدك يعني هلأ؟

هي: بدي اطلع غلطانة، ويأكدولي انهم مش ظواهر صوتية. وانو ما يطلع نتنياهو رئيس حكومة، وما تضل بيوت البدو تتهدم، وما يتجندو المسيحيين متل الدروز، وما يضل حدا كل شوي ينّط لي ويقولي "انتو مش عايشين باسرائيل تتفهمو الي بنعانيه". بديش يا خي افهم ، انا بدي ارجع.