..وبْخاطرَك يَمّييا مْسافر مْنِ سريرَك الأخضر
لسريرَك اليابسْ
لابس دَمار بْلادَك وزَهْر السكوتْ
لابس الوقت ال عم يموتْ
ووجّك العابسْ
منفى الشمس الغايبي ودمع البيوتْ...
■ ■ ■
يَمّي ما بدّي صدّق عيوني
إذا بكيوا علَيكْ
يَمّي ما بدي شوفهن دِبْلوا عِيْنَيكْ
قلّي شو باك ؟
ضْحَكلي/حاكيني/رِدّ /جاوِبني
تطَلّع بوِجّي/قرّب آغمرني
افْتَحلي إيديكْ
يَمّي أنا عم إندَهَك
خلّيك عندي هَون
صوتَك ما فيي أُوْدَعوا خلف الضبابْ
إسمَك البحر مْسَوّر بْرَمل العذابْ
يَمّي دخيلَك لَأْ
يَمّي دَخيلَك لَأْ
وَقِّفْ... عَمَهلك... سَلّم عْليّي
قلّي أنا راجع عند لِغيابْ
جايبلِك هديّة الأرض العاشقة:
باقة ترابْ...
■ ■ ■
... والموت لمّا بيِجي اضحكلو
قلّو أنا غبرة جرَيْك الهاشلة يا مَوتْ
قلّو أنا متلك أنا يا مَوت
اضحكلو
وجرّب تسرق شويّة وقت منّو
وطلاع عا أعلى منارة عالية
وصرّخ بِعالي الصوت
جايي ياخذني الموت
لا تواخذوني واحفَظوا سِرّي
يا سامعين الصوتْ...

اشترك في «الأخبار» على يوتيوب هنا