لقاء مع حازم الانتحاري


قرر بعض كتّاب صبابة وحنظلة إجراء لقاء افتراضي مع «حازم الانتحاري»، الذي يمثل المواطن المخيمجي إكس، للوقوف على آخر التطورات في المنطقة والعالم.
صبابة وحنظلة: أخ حازم كتبت عنك «مخيمات» سابقاً حين حاولت تفجير نفسك ببائع الجرائد العضاض.
حازم: العضاض؟ ابن الـ(...)
س: أخ حازم كيف تقرأ تطورات المنطقة؟
ج: التورطات في شو تحديداً؟
س: يعني اللي بيصير حوالينا. شو شايف؟
ج: والله سمعت بدهم يروحوا ع الوكالة يصرفوا لنا دولة ع كروت الإعاشة.
س: قصدك طلب أبو مازن مقعد دائم لفلسطين؟
ج: آه. لأنه بدو يروح ع الأمم المتحدة، يعني ع الوكالة! مش الأمم المتحدة بتشتغل عند الوكالة؟ عندهم نفس العلم الأزرق اللي عليه عنكبوت وشجرتين صغار؟
س: نعم، صحيح، ماذا تتوقع من طلب ضم فلسطين إلى الأمم المتحدة؟ هل سيتأثر وضع اللاجئين في المخيم؟
ج: والله هذا سؤال بتسألوه لمدير المخيم، هو بيعرف أكثر عن اللاجئين، ويمكن يجيبلهم الكرسي ع حسابه كمان.
س: يعني بتتوقع انه يصير في عننا دولة ويلموا اللاجئين من الأردن ولبنان وسوريا؟
ج: ما بعرف، يمكن احنا نروح عندهم ع لبنان والأردن.
س: ما هو رأيك بصفقة إطلاق سراح الأسرى؟
ج: يعني مساجين رح يطلعوا؟
س : نعم رح يطلع فوق الألف أسير.
حازم: اشي ممتاز رح ناكل كنافة كثير يعني؟
صبابة وحنظلة: لكن الصفقة ستبعد ما يقارب 400 أسير محرر الى غزة والأردن.
حازم: لأ. بحبش الغزاوزة! بيحطوا شطة ع الكنافة.
صبابة وحنظلة: كيف تنظر الى الربيع العربي؟
حازم: مين ربيع؟
صبابة وحنظلة: ما رأيك بما قاله أبو مازن عن أن الكفاح المسلح خرب بيتنا؟
حازم : شو يعني كفاح مسلح؟
صبابة وحنظلة: يعني زي العضاض هيك بيهجم.
حازم (بغضب): أه والله العضاض ابن الـ(...)خرب بيتنا. عمرو ما عض عسكري، بس بعضعض فينا وبجيران المخيم وبالناس اللي مش يهود.
س: ما هو رأيك بلجوء السلطة لمجلس الأمن في طلب الدولة؟
ج: ليش هم بدهم يسرقوها؟
صبابة وحنظلة: لا مش القصد. أنه عشان يقنعوا العالم بالموافقة ع الدولة
حازم: كان لازم يوخدوا علي ماسورة الكذاب، بيكذب ع الوكالة، وع الأمن. وبيخليهم يصدقوا أبو مازن، بدل ما همّ مفلتينه علينا بيحاول يقنعنا أنه بيشرب نصية الفودكاع نفس واحد!
س: ما رأيك في الثورات العربية وسبب غياب الثورة في فلسطين؟
ج: مش الثورة مش منيحة؟ اللي بيطلع في مظاهرة بيضربوه السلطة (الفلسطينية)؟ كانوا اليهود يضربونا زمان بس بطلوا. هيك أحسن. السلطة مننا وفينا مش عيب يضربوننا.
س: المنطقة إلى أين سيد حازم؟
ج: منطقة المخيم؟ المخيم زي ما هو: ناس بتعيش وناس بتموت. رمضان بياع البطيخ تجوز وماتت سته بعد أسبوع، يعني هياها ناس بتتجوز وبتخلف وناس بتموت.
س: طيب وفي ما يخص الضفة الغربية وقطاع غزة؟
ج: الضفة لحال، وغزة لحال. بلاش السلطة تفكرك جاسوس حمساوي.
س: طيب بالنسبة إلى الضفة؟
ج: الضفة الناس انهبلت فيها. الناس حامله كراسي زرقا ودايرة فيها في الشوارع. فكرت في كأس العالم اجا برام الله وما اجا ع نابلس وبلاطة. كانوا حاملين أعلام البرتغال ودايرين يشجعوا فيها.
صبابة وحنظلة: أخ حازم هذه كانت مسيرة لجعل البرتغال توافق على انضمام فلسطين للأمم المتحدة.
حازم: يعني الأمم المتحدة بتصرف ع اللاجئين ومش معترفة بفلسطين؟ ليش يصرفوا علينا من الأساس؟
صبابة وحنظلة: أخ حازم نريد منك كلمة توجهها لقراء «مخيمات» في «الأخبار».
حازم: وين هاي الجريدة؟
صبابة وحنظلة: لبنان
حازم: بحب أحكيلهم أنه إذا الوكالة بتصرفلنا دولة ع كرت المؤن فليعتبروا المخيمات سفارات للدولة.
س: يعني ما بتتوقع عودة اللاجئين ع فلسطين؟
ج: وين بدهم يحطوهم؟ يبنولهم مستوطنات؟
صبابة وحنظلة: نشكرك سيد حازم.
حازم: ع أي قناة رح تطلع هاي المقابلة؟

معاذ عابد ـــــ مخيم بلاطة