متل الحلم هنّي

غابوا على دغوش* العمر حِنِي*
شو بخبرك يا بلاد ؟
قالوا علينا غراب
والوجع لسا بحرقتك ما داب

و معتق بدَّني*
متل الحلم هني

عم يطلعوا طوابير من قهر العمر
و يعِدوا هالأيام تيعودوا
و مية الأحباب ما بتطفي الجمِر
و الروح في عندا شرش
بيشتاق لجدودو
ما خرّف الختيار لمّن ضيع الطرقات بالغربة
ما البوصلة بقلبو
تشدو على حدودو
فكرو إذا شافو حدا
بيدلوا ع الضيعة
طلع الحدا مَنو حدا
و ما بيمسح الدمعة
كلبش الختيار دياتو ورا ضهرو
وخبى الغِني بقهرو
صار البكي يغني
متل الحلم هني

يا بلادنا غصّ الولد
و سنين بعدا سنين
وبكذبة خربشنا البلد
والمشنقة ناطرين
والطفل يلي بيلعب بهالدار
ينده لستو المتل شجرة تين
يا ستي :عن جد يلي استشهدوا راحوا على فلسطين ؟
و بتحضنوا ستو
عن جد يا ستي
راحوا على الجَنّة ..
متل الحلم هنّي

.........

*دغوش : الشمس عند المغيب
*دَنّي : مفرد دِنان