شو جابرها الله؟

-هلق هاي اسرائيل ..انو ما بعرف يا زلمة! كيف يعني بالآخر بترضخ للأضراب تبع الأسرى الفلسطينية عن الطعام؟
-ايه والله صحيح. انا كمان بسأل حالي هالسؤال. هلق هيه بتتركهن للآخر..يعني واضح انو بيكونوا صاروا رح يموتوا وانعطبوا.. بس كمان السؤال بينسأل..انو بلكي بتخاف علي صيتها كدولة ديموقراطية؟

-معقول راسك؟ هياها عم تفعصن تفعيص، وقدام الكاميرات وآخر همها. كل ما قتلت واحد بتقول انو كان بدو يطعن حدا.. حتى لو كان نايم ببيتو.. ما هيه شو بدها بالآخر؟
-شو بدها؟
-ولو؟ بيتو. وإنو إذا شي.. بيوت الجيران ما بتضر، وفوق منهم بيوت القرايب وهيك اشيا..
-ما ايه.. منشان هيك عم اسأل. شي بيحير! انو ليه حتى تتفاوض معهم اساسا.. ما اصلا ما حدا عم يطالب فيهن فعليا..وبالتضامن، اذا شلنا ع جنب تضامن جورج ابراهيم عبدالله معهم بالصيام واسرى تانيين كمان بفلسطين المحتلة..يعني بدك تقول بالإجمال :التضامن فايسبوكي ما بيعضّ. ولا حتى التويتر..وإذا شي، بيطلع بيرد عليهم هيدا الحيوان الناطق باسم الجيش الاسرائيلي، شو اسمو؟ ايه! أفيخاي أدرعي، وقال يابا بتعلق ع الفايسبوك وبيزلغط التويتر .. طيب ما زال كلو زعبرة بزعبرة، شو جابرها الله؟
-والله ما بعرف.. بس انو فكر فيها: كمان ما فيها ما ترد!
-ليه؟ هياه السنيورة: اعتصم البلد عن بكرة ابيه تحت السراي سنة ونص.. شو صار؟ ولا شي. رجعوا..فكوا هالخيم، وسربوا ع بيوتن! يعني ركبوا ولا فكوا .. آخر همو للسنيورة. بالنسبة الو كانت الدني عم تشتي، لا بصاق ولا شي.
-الله عليك. انو كل هالبرمة تتقللي انو اسرائيل احسن من السنيورة؟
-..اعوذ بالله. بالعكس تماما. بدي قلك انو هوي اسوأ من اسرائيل.

ابتداءً من تاريخ 30 تموز 2015، تم إيقاف التعليقات على المقالات مؤقتاً نظراً لبعض الصعوبات والتعديلات التقنية، يمكنكم التعليق وإبداء الرأي والتواصل مع الكتاب عبر صفحتنا الالكترونية على

فايسبوك ( https://www.facebook.com/AlakhbarNews)، أو عبر البريد الالكتروني: comments@al-akhbar.com