راجع يتعمر؟ اي ساعة؟

-ليك..بتعرف شو اسوأ من قطعة الكهربا بهالشوب وهالرطوبة؟
- هوهووو... في كتير اسوأ.
-مثلا؟
-مثلا تنقطع الكهربا بوقت غير وقت القطع وما تعرف اذا زيادة تقنين غير معلنة او عطل ممكن يتصلح بعد شوي. مثلا..
-مزبوط.. فيها كمان تنقطع بغير وقت القطع اللي هوي حوالي ١٢ ساعة يوميا عنا بالمنطقة، ع اساس مناطق يعني .. ويروحوا يناموا ٧ عشية احسنلهن!ايه وتضطر تطلع تقعد بالهوا برا.. وانو يابا في نسمة، واذ بتوصلك الروايح تبع الزبالة اللي ما حدا عم يشيلها.. مع انو المكب بعيد شوي.. بس انو الهوا غربي . والأضرب؟ يكون داير لزقك، يعني بالضيعة اللي حدك دغري، مهرجان ع اساس لتنشيط السياحة بالمناطق، وواصلتلك اللعلعة لنص دين قوضة النوم..ع اساس الصوت بتعرف بالجبل بيودي، واوقات بيودي بداهية، وانت قاعد هيك مشوب وفطسان من الروايح بالعتم، ودينيك عم يوجعوك من طبول المهرجان.. وشو فيك تعمل؟ المخفر ما عم يرد..الارجح سهران معهم.

- هيدي ما شي..في اسوأ كمان من هيك
-شو؟
-يكون كل شي قلتو انت هلق، وبعدين، تقوم تقول لحالك هات تأفتح هالراديو ..والله ممتاز الراديو: انو ع البطارية. بتشيل وبتحط بطاريات هاي كل القصة.
-ايه؟
-وايه بتفتح الراديو واذ...بيطلعك خيك المرحوم زكي ناصيف عم يغني راجع راجع يتعمر راجع لبنان.
-هههههه... ايه غيّر المحطة!
-مش القصد.. بس انو في حدا قاعد بالاذاعة، و عم يبرمج الاغاني. وانو لاقى بكل هالفوضى الخلاقة (لغيرنا طبعا)، او اذا بدك بهالبالوعة الطايفة بالمنطقة، انو من المناسب يحط هيك غنية! متل كأنو هالموظف بلا مخ مثلا؟ او ما بيسمع الاخبار؟.
-انا بحبو لزكي ناصيف.. الله يرحمو كان متفائل..
-ايه كان قلبو كتير طيب وبريء وقومي اجتماعي للعضم.. من هودي القوميين القدم ما قبل الانفصال.. مناقبي بيقولوا عنه. والا مستحيل يعمل هيك غنية. هيك غنية لازم يعاقب عليها القانون بجرم تضليل الرأي العام.. انو كيف يعني راجع يتعمر؟ اي ساعة؟ ومع مين؟ والمناقصة ع مين رست؟ جهاد العرب ولا شو اسمو هيداك التاني؟ الا اذا اعتبرنا جبال الزبالة تضاريس عمرانية جديدة، تضاف الى وديان الكسارات..وسهول مخيمات النازحين.. الله يرحمو بس شو بدي الك؟ كان قلبو طيب وحلو متل قمر مشغرة. كان كأنو عم يغني للبنان تاني هوي وحدو شايفو.
-يلا انبسط ما طلعلك جنات ع مد النظر متلا..
-اوووووووه مع وديع؟ او..هيديك الغنية تبع زياد وفيروز: ايه في امل.هههههههه
-دخلك صحيح وينو مش مبين؟
-بالبلد. مختفي بس بالبلد. قالولي عازل حالو وعم يشتغل شي من شهور. منيح..المهم يكون عم يكتب شي.
-او ممكن يكون مستحي منا لانو الف هالغنية ..انو هاي مش تضليل للراي العام كمان؟ في امل؟ بلكي قصدو الحركة؟
-هههه ..مثلا.
يتوسع الكادر قليلا، فنرى خيال شخصين يجلسان في العتمة على شرفة منزل قروي تحيط به الحقول. بين فينة واخري يلتمع "زرزور" جمر سيكارة يمج منها احدهما ثم يمررها الى الشخص الآخر.
-بتعرف شو؟ منيح اللي الحشيشة مش عالكهربا...

ابتداءً من تاريخ 30 تموز 2015، تم إيقاف التعليقات على المقالات مؤقتاً نظراً لبعض الصعوبات والتعديلات التقنية، يمكنكم التعليق وإبداء الرأي والتواصل مع الكتاب عبر صفحتنا الالكترونية على

فايسبوك ( https://www.facebook.com/AlakhbarNews)، أو عبر البريد الالكتروني: comments@al-akhbar.com