ليبانيز بيبول

الطبيب - يا عمي ..كيف بتخللي حالك توصل لهون؟
الزبون – آ..آ..آآآآي (يبدو ان فمه مفتوح)
الطبيب – معقول هالمنظر؟ في خراج تحت الضرس. طيب. قوم، ما فينا نشتغل شي اليوم. رح اعطيك مضاد للإلتهاب.
الزبون -آآآآ..
الطبيب: لحظة (يزيل القطن من فم الزبون).. هلق فيك تحكي.
الزبون (يبصق) ما تخايلت هالقد رح يلتهب..آآآخ.
الطبيب: اولا لازم نعالج الإلتهاب، وبعدين منقتل العصب ومنحشي الضرس.

الزبون: يعني اديش رح تكلفني؟
الطبيب: شي اربع خمس جلسات. بحدود الخمسمية دولار..
الزبون : أوف؟ هالقد؟(يبصق)
الطبيب: لاقيهم كتار؟ اديش دفعت ع ابتسامة هوليوود؟ بعدين انا ما قلتلك لازم تزبط اسنانك بالأول؟
الزبون: مبلى، بس العروس بتحبها! شو فيها يا حكيم؟
الطبيب: ما عم نقول فيها شي. بس قلتلك انو لثتك حساسة ومواد التبييض بتنزع مينا الاسنان وبتلتهب اللثة. بس طلعت من عندي ورحت عند حكيم تاني وعملت اللي براسك .. انو يا با ما بقى فيك تقعد بلا ابتسامة هوليوود؟ اديش دفعتلو؟ بشرفك؟
الزبون: ما انت ما قبلت ..
الطبيب: أكيد ..كيف بدي اعملك ابتسامة هوليوود وأنت اسنانك منخورين نخر؟ بدل ما تحط مصاريك ع هيك اشيا زبط اسنانك اول شي. انو منيحة ابتسامة هوليوود، بس اذا توّر العصب عليك؟ هونيك! ما حتشوف غير تكشيرة الوجع. وليك، وحياتك هيه ذاتها بهوليوود ولا ببرج حمود. قوم الله يسامحك قوم.(الطبيب يبصق هذه المرة)

ابتداءً من تاريخ 30 تموز 2015، تم إيقاف التعليقات على المقالات مؤقتاً نظراً لبعض الصعوبات والتعديلات التقنية، يمكنكم التعليق وإبداء الرأي والتواصل مع الكتاب عبر صفحتنا الالكترونية على

فايسبوك ( https://www.facebook.com/AlakhbarNews)، أو عبر البريد الالكتروني: comments@al-akhbar.com