الله يخليلنا تل ابيب

- شو الاخبار يا معلم؟ في شي جديد عن عرسال؟
-هلق مرتي بعتتلي صور من فوق
-آه.انت من فوق؟
-ايه..اتطلعي (يريني صورة على هاتفه يبدو فيها عدد من الشباب العراسلة وقد جلسوا القرفصاء وبدا نصفهم الاعلى عاريا وقد احنوا رؤوسهم، في حين وقف خلف كل واحد منهم مسلح ملثم)ليكي: صافين شي 12 شب من الضيعة، وحطوا لكل واحد فيهم طلقة براسو..
-يا الهي الكريم! معقول؟ كيف بيعملوا فيكن هيك؟ العمى!

-يا عمي شو بدي قللك؟ والله العظيم اول ما اجوا حطيناهن ببيوتنا، نطبخ ونطعميهم. نعطيهن لحف، بتعرفي فوق برد كتير، خصوصي بالليل.. منطقة جردية! بعدين صاروا يجيبوا عيلهم معهم.. ما حدا فكر انهم رح يعملوا هيك ومعهن عيلهم..
-ما ع اساس تضامن سني؟
-اعوذ بالله! ايا؟ ليه مين داعش؟ انت بتعرفي؟
-ايه ولو؟ هودي تبع دولة الخلافة الاسلامية في الشام والعراق.
-اي سنة واي خلافة؟ ليكي: وين في ولد انخطف من قدام بيتو؟ وين في طفل ضاع؟ كان يتاخد على تل ابيب ويربوه هونيك (!!) اسرائيل صرلها بتشتغل عليهم شي 30 سنة!
-اوووف! معقول؟ منين جايبها هاي؟
-من الانترنت! ولو؟ افتحي انترنت وشوفي!
-وما كان في انترنت وقت اللي فوتوهم ع عرسال؟
-شو بيعرفني..(محرجا) ضحكوا عليهن باربع نسوان
-كيف يعني؟ مين اربع نسوان
-(مغمغا) شو بدك بهالشغلة ..نسوان!
-معليش .. خليني افهم!
-نسوان.. بالاول بعتوهن، فانبسطت الشباب اللي بالجرود فوق (يضحك) وهالشبيبات بالضيعة..
-انو بعتوهن جهاد نكاح يعني؟
-اي جهاد؟ خليها لالله. هودي الصور (يريني الموبايل مرة اخرى) اللي صورتهن مرتي، كبري الصورة هيدا بيتنا مبين: ليكي12 شب.. قال ساعدوا الدرك.. واحد منهم قللهم بتبايعونا وبتشاركونا القتال ضد الجيش.. قللو واحد: انا بفدي الجيش بدمي وازغر عسكري من بلدي بيسواكن كلكن! قاموا قتلوه.
-طيب وين كانت هالمواقف من قبل؟ لحقتوا ابو عجينة وابو طاقية؟
-ابو عجينة؟ هيدا كلب.. ما بيفهم الا بالمصاري! ما زال باع ابن اختو لداعش!
-العمى! ليه شو عمل معهم ابن اختو؟
(-كمن يبوح بسر عرسالي لاجنبية) اخد مصاري تيجيب سلاح وشمع الخيط
-ايه؟
-قالولوا بدنا اياه. قللهم اعطوني 250الف دولار. اعطوه، سلمهم ابن اختو . قاموا قتلوه وحرقوه حرق.. وحياة اولادي.
-(غير مصدقة) اعوذ بالله يا زلمي شو هالخبرية؟
-ما بتصدقي؟ عم احلفلك: سلم ابن اختو!
-بصدق بس انو.. 250الف دولار؟ ما بظن..كتير!
-ايا كتير؟ احكي بالملايين. معهم مصاري ما بتاكلها النيران.
-وكانوا عم يفتوا بالضيعة اكيد! والضيعة محرومة.. بس من وين المصاري؟ كمان من تل ابيب؟
-اكيد! لكن مين؟ آآآخ! لو بس الجيش بيخليني اشتغل معو.. كل ولاد عرسال بدهم يساعدوا الجيش. بتعرفي؟ نحنا منعرف ضيعتنا وحواليها طريق طريق جورة جورة حفّة حفّة، شو بيعرفو ابن عكار او بيروت او حتى البقاع بالدخلات والفوتات والطلعات؟ منشان هيك عم يروح (شهداء) من الجيش.. وك بس يفلتونا عليهن.
-وكيف بدو يأمنلكم الجيش؟ نسيتوا انكم عملتوا العمايل فيه؟
-(يتحمس) بتعرفي ليش؟ بيوم من الايام فاتت ع الضيعة اربع سيارات مدنية، اخدوا شب من فوق (خاطف الاستونيين خالد الحميد) واشتبكوا مع الناس فوق وراح قتلى واحترقت الجيبات .. الناس مش عارفة مين! لما اجوا مخابرات الجيش عملوا فيهم هيك مش عارفين هني مين! طيب يخبروا المختار ..ينسقوا.
-والجيش كيف بدو ينسق مع رئيس بلدية متل ابو عجينة معروف انو عم يساعد المسلحين؟ بيخبروه قبل بوقت حتى يخبي المطلوب يعني؟
-ما بعرف.. هيك صار (يصف السيارة على جنب اكسبريس قهوة) ما تواخذوني لحظة بدي اشتري قنينة ماي (يلتفت الي ويهمس) هيدا صاحب الاكسبرس ياحرام بعدو ما بيعرف انو ابنو قتلوه الصبح ..
-عسكري بالجيش؟
-لا.. من الشباب اللي صفوهم! ضيعانو! جدع ..كان بين اللي خلصوا الدركية..
-(يعود بعد قليل) منو هون.. انا ما بدي خبرو . خلي حدا تاني يخبرو. هلق عم يهددوا اذا بيفوت الجيش عليهم بدهم يقتلوا اهل الضيعة.. والله والله هودي لازم ما يطلع منهم حدا طيّب: لا طفل ولا مرا ولا شيخ ولا رضيع ولا رجال.
-هالقد؟ بس الجيش ما بيصفي عالم. بياخد اسرى ايه، بس تصفية؟ اكيد لا. شو هوي عصابة؟
-(بحماس وقد احمر وجهه ونفرت عروق رقبته) هوي يسلمنا اياهم بس. (يخبط على مقود سرفيسه) ايه والله وحياة هالنعمة لحتى نفرمهم فرم. بدنا ننتفهم تنتيف، نحرقهم حرق وندفنهم بارضهم هالكلاب!
-(أفكر قليلا) صحيح وين بيدفنوا موتاهم هودي؟ عندكن بالمقبرة؟
-لا..ايا؟ بيحرقوا الميت وبيدفنوه بارضو. (يسكت قليلا ثم يقول) اصلا انتي بتعرفي وين بيخلفوا هودي النسوان تبع جهاد النكاح؟
لا والله.. وين؟
-بتل ابيب
-اوف!
-طبعا..
-هلق كل ما واحدة اجاها الطلق بتروح ع تل ابيب؟ شو مستشفى بعلبك الحكومي هيه؟
-هه (يرد متحديا استخفافي) هه! اسهل بكتييير
-كيف هاي؟
-بيطلعوها ع «بيت جن» ومن هونيك بتضلها نازلة وما بتعودي تعرفي شي عنها..
-يه! شو ما في حواجز هونيك؟
-مبلى في حاجز للجيش اللبناني، بس بيسترجوا يحكوا معها شي؟ بيطلعوا المشايخ وراهن، وخللي ابن مرا يوقفها! (يفكر قليلا ثم يقول) اصلا هلق هلق (يضرب على التابلوه) بطلع انا واياكي، بتحطيلي بنزين ع حسابك، باخدك من هون لسوريا للاردن شرط ما بتمرقي على ولا حاجز. قال حواجز! بس الجيش يخلينا نساعدوا وشوفي.
-اييييه! بعد كل هالخبريات؟ اكيد الجيش رح يطلبكن للمساعدة..خدها مني!
أنزل من السرفيس وأهمّ باغلاق الباب، لكنها «ما قطعت معي»! لذا، انحنيت ونظرت اليه من الشباك مبتسمة بسخرية ثم قلت له «ليك حاج.. بتعرف شو؟ الله يخليلنا تل ابيب!».

التعليقات
صورة المستخدم
1500 حرف متبقي
صورة المستخدم

مجهول - 8/20/2014 8:11:51 AM

اذا بدنا نسمع لكل واحد وخبارو عن النصرة وداعش ما بنخلص. بلبنان صار الكل يفتي، مثل مصر واسوأ.

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 8/5/2014 9:08:00 PM

هلّأ داعش و ما داعش, ما في حاجة لنعرف مدى دناءتهم, لكن هذا السائق, لتليت حكي و كذاب, كلامه ليس سوى حكي إشاعات و سرفيسات, و أكيد هناك العديد من المعلومات الصحيحة في ما قاله, لكن المهم أنّك لم تذهبي معه في الرحلة إلى الأردن . لا أحد يتكلّم بهكذا حرّيّة عن أب لوالد قُتل , و هو يريد قنينة ماء منه.. الإنسان لا يتجرّأ و يفضّل العطش, أما هذا رجل دجال و منافق, و له خلفيّة لكلامه و مبالغته,

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 8/11/2014 10:41:06 AM

شو هالتحليل النفسي القوي هيدا يوووووه! انو هيدا مدسوس لانو اشتري قنينة ماي من اب انقتل ابنه وبعدو ما بيعرف؟ شي قوي كتير.. الله يرحمك يا فرويد. حبيبي المجهول: لو اني شكيت بعفوية كلامه ما كنت نقلتو..ماشي؟

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

صالح صالح - 8/5/2014 4:20:00 PM

هم مجموعات من اللصوص، الزعران، والسرسريةالذين اكتشفوا الإسلام بعد أن ارتكبوا جميع أنواع الموبقات في صغرهم وشبابهم. أعلنوا توبتهم إلى الله بعد أن ارتكبوا الجرائم بجميع أنواعها. لكن أخلاقهم السيئة التي قامت على الإجرام وإيذاء الناس من حولهم بقيت معهم، حافظوا عليها وظلوا يمارسونها لكن هذه المرة باسم الإسلام. أعمال الإجرام تحولت إلى عمليات قتل جماعية للأسرى في خلاف واضح لتعاليم النبي محمد ووصايا الصحابة، أعمال السلب والنهب استمرت. هؤلاء المجرمون واللصوص والغوغاء جاؤوا من جميع أصقاع الأرض ليمارسوا إجرامهم بالشعب السوري (والآن بالشعب اللبناني) طمعا في أن يغفر الله لهم جرائمهم السابقة واللاحقة وأملا في دخول الجنة لتناول طعام العشاء مع رسول الله محمد. نقول لهم: هذا لن يحصل ببساطة لأنكم تعيشون على آمال واهمة وأضغاث أحلام. مكانكم في الدنيا هو جهنم لأنكم ستحترقون على يد الجيشين السوري واللبناني ورجال حزب الله وغيره أما مقامكم في الآخرة فأمر لا نهتم له لأننا سنحاسبكم في الدنيا.

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

مجهول - 8/5/2014 11:06:10 AM

سؤال وجيه... حدن عندو إجابة غير "الريس" فوق؟

اضف تعليق جديد
انقر للتصويت
صورة المستخدم
1500 حرف متبقي
صورة المستخدم

Taghleb Taghleb - 8/5/2014 7:06:16 AM

أنا قطعت معي ، لآنهم" تسربوا كالنمل من عيوننا " كما قال نزار - صادقا - في هوامش على دفتر النكسة.

اضف تعليق جديد
انقر للتصويت
صورة المستخدم
1500 حرف متبقي
شاركونا رأيكم